Proxecto Terra

Dende o luns 20 de novembro ata o 5 de decembro o Equipo de Dinamización da Lingua Galega do CPI Viaño Pequeno (Trazo, A Coruña) presenta a exposición 'Toponimia galega castelanizada e deturpada'.

Como sabemos, a Lei de Normalización Lingüística, aprobada por unanimidade no parlamento galego (1983) recolle no artigo 10 que os topónimos de Galicia terán como única forma oficial a galega. Estas denominacións son as legais a todos os efectos e a rotulaxe terá que concordar con elas. Por desgraza, corenta e un anos despois da aprobación desta lei, moita toponimia do noso país segue rotulada en castelán. O Equipo de Dinamización da Lingua Galega do IES PUGA RAMÓN (A Coruña), comandado pola profesora Luísa Diéguez, organizou a recollida de toponimia castelanizada de calquera punto xeográfico de Galicia. Con este traballo preténdese denunciar o incumprimento desta lei por parte da Administración. A exposición figurou en múltiples lugares, dende centros educativos ata concellos e asociacións culturais. Logo do CPI Viaño Pequeno, será exposta pola Universidade de Vigo.

Consta de máis de cen documentos con información sobre a toponimia, a lexislación que a ampara, fotografías que evidencian o seu uso errróneo e un apartado de humor gráfico.

Así mesmo, a presenza desta exposición no centro inclúese no Proxecto Terra, co que colaboramos ao longo do curso.Trátase dun proxecto do Colexio de Arquitectos de Galicia dirixido ás distintas etapas educativas co fin de contribuír a mellorar a formación que a poboación escolar galega debe ter sobre as xentes, os espazos e os lugares que habitamos e inclúese nos Plans Proxecta da Consellería de Cultura, Educación, Formación Profesional e Universidades.

Esta actividade forma parte do proxecto didáctico e cultural que organiza o Equipo de Dinamización da Lingua Galega do CPI Viaño Pequeno. No Samaín ou Defuntos o centro organizou, cun notable éxito, un concurso de deseño de cabazas arrepiantes para ESO e en Educación Infantil e Primaria o alumnado emocionouse participando no concurso de Casas do terror. Ao longo do curso presente, este EDLG colabora na organización e desenvolvemento do festival de Nadal, o Entroido ou as Letras Galegas. Ademais, participa na commemoración do Día contra a violencia á muller, do Día da muller e especialmente o Día de Rosalía, no cal todo o centro canta a Alborada de Rosalía e degusta o Caldo de Gloria.

Acompañamos unha serie de fotografías da exposición no vestíbulo e corredores do edificio de ESO do CPI Viaño Pequeno.